Shërbimi elektronik "Aplikim për regjistrim fillestar të njëkohshëm në Regjistrin Tregtar dhe Regjistrin e Pronarëve Përfitues të shoqërive aksionare (SH.A)" i ofrohet një individi/qytetari që ka krijuar në portal llogarinë e tij si individ. Një nga subjektet që detyrohen të regjistrohen në regjistrin tregtar dhe në regjistrin e Pronarit Përfitues, janë Shoqëritë Aksionare. Baza Ligjore: - Ligji nr. 9723, datë 03.05.2007, “Për Regjistrimin e Biznesit”, i ndryshuar; - Ligji nr. 9901, datë 14.04.2008, “Për Shoqëritë Tregtare”, i ndryshuar; - Ligji nr. 9920, datë: 19.05.2008, "Procedurat Tatimore në Republikën e Shqipërisë”, i ndryshuar; - Ligji nr. 9880 datë 25.2.2008 “Për nënshkrimin elektronik”; - Ligji nr. 10273 datë 29.4.2010 “Për dokumentin elektronik” dhe aktet nënligjore në zbatim të këtyre ligjeve; - Ligji nr. 112/2020 “Për regjistrin e pronarëve përfitues”, i ndryshuar

Dokumentacioni i nevojshëm
Dokumente që duhet të ngarkohen nga aplikanti për Regjistrin Tregtar: - Dokumenti i identifikimit të aplikantit ; - Dokumenti i identifikimit të /aksionar/administrator/ këshill/ekspert, etj.; Kujdes: Dokumentet e identifikimit, duhet të ngarkohen vetëm në opsionin përkatës. Në të kundërt përbën shkelje të ligjit për mbrojtjen e të dhënave personale; - Akti i përfaqësimit, në formën e kërkuar nga ligji, nëse aplikanti është i ndryshëm nga personi që legjitimohet të kryejë regjistrimin; - Mandati bankar për pagesën e kapitalit në para (të paktën një të katërtën e vlerës); - Specimeni i nënshkrimit (firma) të përfaqësuesit ligjor të shoqërisë (nëse nuk është depozituar në akte); - Statuti dhe Akti i Themelimit të shoqërisë, në rast se janë hartuar si 2 dokumente të veçanta (afati 30 ditë nga data e themelimit) ; - Akte të tjera që i përkasin personit juridik, në rastin që shoqëria krijohet edhe nga person juridik (shqiptar, ose i huaj),(Neni 29, Ligji Nr.9723, date 03.05.2007 “Per Regjistrimin e Biznesit” i ndryshuar); - Akti i ekspertimit të ekspertit vlerësues të licensuar (emëruar me vendim Gjykate), për pagesën e kapitalit në natyrë (nëse ka kapital në natyrë); - Aktet e tjera të nevojshme për themelimin, sipas legjislacionit në fuqi Dokumente që duhet të ngarkohen nga aplikanti për Regjistrin e Pronarit Përfitues: - Akti i përfaqësimit, në formën e kërkuar nga ligji, nëse aplikanti është i ndryshëm nga personi që legjitimohet të kryejë regjistrimin; - Dokumentacionin që vërteton numrin unik të identifikimit, emrin si dhe datën e regjistrimit të subjektit raportues në regjistrin përkatës; - Dokumentacionin e autoritetit kompetent regjistrues, që vërteton se pronari përfitues i regjistruar është zotërues i 25% ose më tepër të aksioneve/kuotave të kapitalit; ose të të drejtave të votimit ose dokumentacion tjetër që përmban informacionin e nevojshëm për identifikimin dhe regjistrimin e pronarit përfitues; - Deklarata me shkrim e nënshkruar nga përfaqësuesi ligjor i subjektit raportues, ku të përcaktohen saktësisht hapat e ndërmarra për identifikimin e pronarin përfitues si dhe arsyet e identifikimit të tij në këtë pozicion ( rasti kur nuk arrihet të identifikohet individi zotërues i 25% ose më tepër të aksioneve/kuotave të kapitalit; ose të të drejtave të votimit); -Dokumentacion që vërteton kontrollin e individit të regjistruar si pronar përfitues, në subjektin raportues (rasti kur nuk arrihet të identifikohet individi zotërues i 25% ose më tepër të aksioneve/kuotave të kapitalit; ose të të drejtave të votimit); - Dokumentacion që vërteton pozicionin e individit të regjistruar si pronar përfitues, në subjektin raportues (rasti kur nuk arrihet të identifikohet individi zotërues i 25% ose më tepër të aksioneve/kuotave të kapitalit; ose të të drejtave të votimit); - Dokumentacion tjetër shoqërues që vërteton të dhënat e regjistruara; Në rast se ndaj subjektit raportues është vendosur kundërvajtje administrative duhet të bashkëlidhni edhe mandatin e pagesës së gjobës së derdhur në një nga bankat e nivelit të dytë, mandat i cili për t'u klasifikuar si i vlefshëm duhet të përmbajë të dhënat sipas faturës së arkëtimit : Fatura

Hapat e procedurës
- Identifikohuni si qytetar në portalin e-Albania; - Zgjidhni shërbimin " Aplikim për regjistrim fillestar të njëkohshëm në Regjistrin Tregtar dhe Regjistrin e Pronarëve Përfitues të shoqërive aksionare (SH.A)” - Klikoni butonin "Përdor" - Plotësoni formularin elektronik me të dhënat e nevojshme mbi formën e shoqërisë të cilën do të regjistroni, si dhe të dhënat e pronarëve përfitues; - Ngarkoni dokumentacionin e nevojshëm; - Klikoni butonin “Dërgo” në faqen e fundit të formularit; - Klikoni butonin “Dergo kodin e nënshkrimit”; - Pasi aplikanti, vendos kodin e nënshkrimit, i jep komandën “Nënshkruaj”; - Shqyrtimi i aplikimit bëhet nga nëpunësi i autorizuar i QKB-së; - Pas vlerësimit të aplikimit merret vendimi përkatës ( Pezullim/Miratim/ Refuzim); - Përgjigja dërgohet tek subjekti aplikues nga specialistët përkatës me email në mënyre automatike nga sistemi dhe po ashtu tek ”Hapësira Ime” në portalin e-Albania. Kujdes: Aplikanti, duhet të jetë i pajisur me nënshkrim elektronik!

Koha e nevojshme e marrjes së shërbimit
QKB, pasi kryen verifikimet përkatëse, në zbatim të ligjit dhe akteve nënligjore në fuqi dhe vëren përmbushjen e kushteve për regjistrim, kryen regjistrimin në regjistër, brenda një afati prej një dite nga data e paraqitjes së aplikimit. Sqarim: Për aplikimet e kryera gjatë ditëve të pushimit zyrtar afati për shqyrtimin e aplikimin fillon me fillimin e orarit zyrtar të punës për ditën pasardhëse.

Periudha e vlefshmërisë
Pa afat

Kostot
Pa pagesë

Më shumë
Për çdo pyetje apo paqartësi mbi përdorimin e shërbimit mund të kontaktoni në adresën helpdesk@e-albania.al