Shërbimi elektronik "Aplikim për çregjistrimin e personit fizik" u vjen në ndihmë personave fizikë të kryejnë aplikimin online për çregjistrim Personi Fizik, duke plotësuar formularin online me qëllim mbylljen përfundimtare të aktivitetit Baza ligjore: - Ligji nr. 9723, datë 03.05.2007, “Për Regjistrimin e Biznesit”, i ndryshuar; - Ligji nr. 9901, datë 14.04.2008, “Për Shoqëritë Tregtare”, i ndryshuar; - Ligji nr.9920, datë: 19.05.2008, "Procedurat Tatimore në Republikën e Shqipërisë”, i ndryshuar; - Ligji nr. 9880 datë 25.2.2008 “Për nënshkrimin elektronik”; - Ligji nr. 10273 datë 29.4.2010 “Për dokumentin elektronik” dhe aktet nënligjore në zbatim të këtyre ligjeve.

Dokumentacioni i nevojshëm
Dokumente që ngarkohen nga aplikanti: - Akti i përfaqësimit, në formën e kërkuar nga ligji, nëse aplikanti është i ndryshëm nga personi që legjitimohet të kryejë regjistrimin; - Aktet e tjera të nevojshme për regjistrimin, sipas legjislacionit në fuqi.

Hapat e procedurës
- Identifikohuni si biznes në portalin e-Albania; (Kujdes: Aplikanti, duhet të jetë i pajisur me nënshkrim elektronik); - Zgjidhni shërbimin "Aplikim për çregjistrimin e personit fizik”; - Klikoni butonin "Përdor" - Plotësoni formularin elektronik me të dhënat e nevojshme mbi subjektin; -Ngarko dokumentacionin e nevojshëm; - Klikoni butonin “Dërgo” në faqen e fundit të formularit; - Dergo kodin e nënshkrimit; - Pasi aplikanti, vendos kodin e nënshkrimit, i jep komandën “Nënshkruaj”; - Shqyrtimi i aplikimit bëhet nga nëpunësi i autorizuar i QKB-së; - Pas vlerësimit të aplikimit merret vendimi përkatës (Pezullim/çregjistrim në pritje DPT / Refuzim); - Përgjigja dërgohet tek subjekti aplikues nga specialistët përkatës me email në mënyre automatike nga sistemi dhe po ashtu tek ”Hapësira Ime” në portalin e-Albania.

Koha e nevojshme e marrjes së shërbimit
QKB, me marrjen e kërkesës për çregjistrim të personit fizik, pasi kryen verifikimet përkatëse, sipas nenit 54 të këtij nr.9723/2007 dhe vëren përmbushjen e kushteve për regjistrim, në bazë të nenit 45, të ligjit Nr.9920, datë 19.05.2008 “Për procedurat tatimore”, i ndryshuar, njofton menjëherë organin tatimor në rrugë elektronike mbi datën e kërkesës për çregjistrimin të subjektit. Administrata tatimore, brenda 10 ditëve pune nga data e paraqitjes së kërkesës për çregjistrim të personave fizikë, është e detyruar të verifikojë dhe të vlerësojë situatën tatimore të subjektit/ tatimpaguesit në llogarinë e tij në kontabilitetin dhe sistemin e të dhënave që disponon, si dhe për deklaratat e padorëzuara nga ai, administrata tatimore njofton brenda këtyre 10 ditëve tatimpaguesin. Kur administrata tatimore, sipas analizës së riskut, gjykon se është e nevojshme të ushtrojë kontroll në mjedisin ku kryen veprimtarinë subjekti, ky kontroll dhe pasqyrimi i tij në situatën e tatimpaguesit nuk mund të zgjasë më shumë se 30 ditë pune. Nëse, organi tatimor nuk ka paraqitur ndonjë kundërshtim me shkrim brenda afatit ligjor 30 ditë pune, Qendra Kombëtare e Biznesit, kryen menjëherë çregjistrimin e subjektit. Sqarim: Për aplikimet e kryera gjatë ditëve të pushimit zyrtar afati për shqyrtimin e aplikimin fillon me fillimin e orarit zyrtar të punës për ditën pasardhëse.

Periudha e vlefshmërisë
Në rastin e miratimit të aplikimit, lëshohet vërtetimi i miratimit të aplikimit, i cili nuk ka afat.

Kostot
Pa pagesë

Më shumë
Për çdo pyetje apo paqartësi mbi përdorimin e shërbimit mund të kontaktoni në adresën helpdesk@e-albania.al