Shërbimi elektronik "Kërkesë për ushtrimin e veprimtarisë si stacion plazhi" u mundëson subjekteve që disponojnë strukturë akomoduese para/në afërsi me hapësirën e plazhit, të bëjnë kërkesë online për marrjen në përdorim të hapësirës së plazhit për ushtrimin e veprimtarisë si stacion plazhi, në përputhje me VKM nr. 649, datë 16.10.2024 “Për miratimin e rregullores për kushtet dhe kriteret e ushtrimit të veprimtarisë së stacionit të plazhit”. Përzgjedhja e subjekteve për lidhjen e kontratave për ushtrimin e veprimtarisë së stacioneve të plazheve, bëhet sipas prioritetit të mëposhtëm: - Subjekti të disponojë një strukturë akomoduese të kategorizuar nga ministria përgjegjëse për turizmin, me hapësirë plazhi para strukturës akomoduese; - Subjekti të disponojë një strukturë akomoduese të kategorizuar nga ministria përgjegjëse për turizmin, me hapësirë plazhi në afërsi të strukturës akomoduese. Kontrata për dhënien në përdorim të hapësirës së plazhit për ushtrimin e veprimtarisë stacion plazhi bëhet nga Agjencia Kombëtare e Bregdetit (AKB) dhe nënshkruhet me afat nga 1 (një) deri në 5 (pesë) vjet, sipas vendimmarrjes të Komitetit të Menaxhimit të Sezonit Turistik. (Për çdo stacion plazhi/parcelë plazhi aplikimi bëhet i veçantë).

Dokumentacioni i nevojshëm
Dokumente që duhet të ngarkohen nga aplikanti kur plotësohet kërkesa e aplikimit: - Plani i operimit për ushtrimin e veprimtarisë si stacion plazhi me strukturë akomoduese të kategorizuar nga ministria përgjegjëse për turizmin, me hapësirë plazhi para/në afërsi të strukturës akomoduese (sipas formatit standard); - Foto të jashtme të qarta të strukturës akomoduese, të cilat të identifikojnë strukturën akomoduese në raport me hapësirën e plazhit; - Foto të qarta të hapësirës së plazhit (Stacionit të plazhit) për të cilën po aplikoni. Dokumente që duhet të ngarkohen nga aplikanti pas kualifikimit paraprak, në fazën e dytë të aplikimit subjekti, brenda datës 31 mars: - Planvendosjen përkatëse të stacionit të plazhit, e cila përgatitet nga njësia e vetëqeverisjes vendore, ku specifikohet numri i çadrave, duke mbajtur në konsideratë distancat e parashikuara në këtë rregullore dhe sipërfaqen konkrete, e cila nuk duhet të tejkalojë numrin e çadrave të miratuara të stacionit të plazhit dhe të jetë në mënyrë perpendikulare me bregun e detit/liqenit; - Mandatpagesën vjetore të sipërfaqes së stacionit të plazhit gjeneruar nga ana e NJVV-së, si palë përfituese, sipas tarifave vendore në fuqi, ku detajohet detyrimi financiar vjetor për përdorimin e sipërfaqes së stacionit të plazhit dhe vërtetimi i pagesës së kryer nga ana e subjektit; - Vërtetimin nga autoritetet tatimore se subjekti ka shlyer të gjitha detyrimet tatimore qendrore; - Vërtetimin nga autoritetet përkatëse se subjekti ka shlyer të gjitha detyrimet detyrimet vendore; - Marrëveshjen e noterizuar me vrojtuesin e plazhit, shoqëruar me certifikatën përkatëse të kualifikimit, e vlefshme përgjatë gjithë kohëzgjatjes brenda të cilës ushtrohet veprimtaria e stacionit të plazhit.

Hapat e procedurës
Faza I (Aplikimi) - Identifikohuni si biznes në portalin e-Albania; - Zgjidhni shërbimin "Kërkesë për ushtrimin e veprimtarisë si stacion plazhi"; - Klikoni butonin "Përdor" dhe plotësoni kërkesën, sipas formatit standard; - Përzgjidhni numrin identifikues përkatës të stacionit të plazhit/kodin e parcelës së plazhit duke u referuar në hartën dixhitale të hapësirave të lejuara dhe bashkëlidhni dokumentacionin e kërkesës; - Kërkesa e paraqitur i shkon për shqyrtim Grupit Teknik të Shqyrtimit të Aplikimeve (GTSHA); - Pas shqyrtimit të kërkesave, në rast se: konstatohet mungesë apo pasaktësi dokumentacioni, GTSHA njofton menjëherë subjektin nëpërmjet portalit e-Albania për plotësimin e dokumentacionit të nevojshëm. Subjekti plotëson dokumentacionin e nevojshëm brenda 30 (tridhjetë) ditëve nga marrja e njoftimi. Në rast se subjekti nuk plotëson dokumentacionin brenda afatit të kërkuar, kërkesa konsiderohet si e paregjistruar dhe i kthehet subjektit bashkë me aktet e tjera nëpërmjet portalit e-Albania; Faza II (Dokumentacioni i fazës së dytë të aplikimit) Në rast se subjekti i plotëson kriteret dhe dokumentacioni i paraqitur rezulton i plotë, GTSHA-ja njofton subjektin nëpërmjet portalit e-Albania për fazën e dytë të procedurës dhe njofton elektronikisht njësinë përkatëse të vetëqeverisjes vendore, që subjekti është kualifikuar në fazën e parë, me qëllim plotësimin e dokumentacionit shtesë, brenda datës 31 mars, si më poshtë: - Planvendosjen përkatëse të stacionit të plazhit, e cila përgatitet nga njësia e vetëqeverisjes vendore, ku specifikohet numri i çadrave, duke mbajtur në konsideratë distancat e parashikuara në rregulloren e plazheve dhe sipërfaqen konkrete, e cila nuk duhet të tejkalojë numrin e çadrave të miratuara të stacionit të plazhit dhe të jetë në mënyrë perpendikulare me bregun e detit/liqenit. - Gjenerimin e mandatpagesës vjetore të sipërfaqes së stacionit të plazhit nga ana e NJVV-së, si palë përfituese, sipas tarifave vendore në fuqi, ku detajohet detyrimi financiar vjetor për përdorimin e sipërfaqes së stacionit të plazhit dhe vërtetimi i pagesës së kryer nga ana e subjektit; - Vërtetimin nga autoritetet tatimore se subjekti ka shlyer të gjitha detyrimet tatimore qendrore dhe detyrimet vendore; - Marrëveshjen e noterizuar me vrojtuesin e plazhit, shoqëruar me certifikatën përkatëse të kualifikimit, e vlefshme përgjatë gjithë kohëzgjatjes, sipas afatit të parashikuar në pikën 14, neni 7 të rregullores së plazheve. Faza III (Lidhja e kontratës) - Pas plotësimit të dokumentacionit të mësipërm, GTSHA-ja miraton në portalin e-Albania aplikimin përkatës dhe AKB-ja njofton menjëherë subjektin dhe NJVV-në për nënshkrimin e kontratës. Modeli kontratës tip që AKB-ja nënshkruan me subjektin është sipas shtojcës 1, që i bashkëlidhet rregullores së plazheve. - Çdo informacion në lidhje me aplikimin tuaj do të dërgohet në adresën e-mail që keni përdorur për regjistrimin në portalin në e-Albania. Në rast se dëshironi të përdorni një email tjetër, ju duhet ta ndryshoni në rubrikën "Hapësira ime" duke klikuar: Ndrysho të dhënat e llogarisë. Shënim: Përjashtimisht, për subjektet që aplikojnë për stacion plazhi, për Bashkitë Fier dhe Divjakë, kërkesa, paraqitet me shkrim pranë Agjencisë Kombëtare të Bregdetit dhe për dijeni NJVV-së, së bashku me dokumentacionin, që vërteton plotësimin e kritereve të parashikuara në nenin 14, pika 3, 4 të VKM-së nr. 649, datë 16.10.2024 “Për miratimin e rregullores për kushtet dhe kriteret e ushtrimit të veprimtarisë së stacionit të plazhit.

Koha e nevojshme e marrjes së shërbimit
30 ditë

Periudha e vlefshmërisë
Periudha, brenda të cilës ushtrohet veprimtaria e stacionit të plazhit, është nga 1 maj deri më 15 nëntor të çdo viti dhe kur subjekti ushtron veprimtarinë ofron të gjitha shërbimet dhe përmbushen të gjitha kushtet minimale, të përcaktuara në bazë të tipologjisë së plazhit ku do të ushtrohet aktiviteti.

Kostot
Pa pagesë

Më shumë
Për çdo pyetje apo paqartësi mbi përdorimin e shërbimit mund të kontaktoni në adresën helpdesk@e-albania.al