Çelet faza e votimit në Konkursin e Turizmit që organizon Agjencia Kombëtare e Shoqërisë së Informacionit në portalin e-Albania. Fituesit e edicionit të dytë të Konkursit të Turizmit përcaktohen pikërisht nga votimi online, ndaj mos hezitoni që të jepni pëlqimin tuaj. Këtu do të gjeni të gjitha aplikimet e mbërritura.

Procesi i votimit realizohet lehtësisht në portalin e-Albania tek hapësira "Aplikime" që gjendet në kategorinë "Konkursi i Turizmit”, por për të votuar duhet të jeni patjetër përdorues të regjistruar në portal. Regjistrohuni këtu.

Përcaktimi i fituesve të konkursit realizohet vetëm nëpërmjet votimit onlineqë nis prej sot dhe përfundon më 26 shtator. Çdo përdorues i portalit ka mundësi të votojë një numër të pakufizuar aplikimesh për çdo kategori, duke dhënë një votë në total për çdo aplikim të parapëlqyer.

Konkursi do të kurorëzojë 3 fitues ku një aplikant fitues gëzon të drejtën e fitimit të vetëm një paketë dhuratë. Çmimi i parë, i cili përfshin një paketë udhëtimi çift për rafting në lumin Vjosë (Përmet), duke përfshirë dhe akomodimin në hotel, nga agjencia “Albania Rafting Group”, do t’i jepet aplikantit që do të ketë aplikimin me numrin më të madh të votave në konkurs.

Secili prej dy fituesve të çmimit të dytë dhe të tretë, do të përfitojë një paketë turistike dy ditore në një prej dy destinacioneve të ndryshme të ofruara prej agjencisë “My Albania Nature Explorers”, Valbonë dhe Theth, për të eksploruar Shqipërinë dhe për të parë e për të marrë më të mirën nga natyra jonë e bukur. Fituesit do të zgjedhin sipas dëshirës njërën prej paketave të mësipërme, në një hark kohor prej një muaj nga kurorëzimi si fitues.

Për çdo pyetje lidhur me konkursin, na shkruani në info@akshi.gov.al